Luk 9 | BOJ | STEP | Bati bei Yesus na aqa aŋgro 12-pela naŋgi koroinjrsiqa naŋgi mondor uge uge winjroqnqajqa deqa ti tamo naŋgo ma kobotetnjroqnqajqa deqa ti siŋgila enjrej.

Luke 9

Yesus na aqa aŋgro 12-pela naŋgi wau enjrej

1 Bati bei Yesus na aqa aŋgro 12-pela naŋgi koroinjrsiqa naŋgi mondor uge uge winjroqnqajqa deqa ti tamo naŋgo ma kobotetnjroqnqajqa deqa ti siŋgila enjrej. 2 Siŋgila enjrsiq qariŋnjrsiqa minjrej, “Niŋgi giloqnsibqa Qotei a tamo uŋgasari naŋgo Mandor Koba sosiqa naŋgi taqatnjreqnu anjam di minjre minjre laqnsibqa naŋgo ma kobotetnjroqniye.” 3 Osiqa endegsi minjrej, “Niŋgi iŋgi iŋgi osib gilaib. Toqoŋ ojaib. Nuŋgo qaquŋ aib. Uyo iŋgi bei osib gilaib. Silali osib gilaib. Gara jugo aiye aiyel aib. 4 Niŋgi qure bei beiq di brantoqnsibqa tal qujaiq di soqniye. Dena olo tigelosib qure beiq giloqniye. 5 Tamo naŋgi niŋgi gereiŋgosaiabqa niŋgi qure di uratqa oqnsib nuŋgo siŋga tumbrum butuyoqniye. Yimqa naŋgi nuŋgo kumbra di unsib poinjrqas, ‘Bole, iga kumbra ugetonum.’” 6 Yesus a na aqa aŋgro 12-pela naŋgi anjam degsi minjrnaqa naŋgi tigelosib qure qureq giloqnsibqa Yesus aqa anjam bole tamo uŋgasari naŋgi minjroqnsib laqnsibqa naŋgo ma kobotetnjroiyoqneb.

Herot a qalieqajqa, Yesus a tamo yai

7 Naŋgi degsib Yesus aqa ñam mare mare laqnabqa Mandor Koba Herot a dego quej. Tamo qudei naŋgi endegsib marnab quej, “Yesus a Jon yansnjro qaji tamo de kio? A moisiq olo subq na tigelqo.” Qusiqa endegsi are qalej, “Jon e na nami kakoro gentem qaji agi a kio?” Osiqa areqalo kobaiyej. 8 Onaqa tamo qudei naŋgi maroqneb, “Yesus a Elaija kio olo bqo?” Onaqa qudei maroqneb, “Yesus a Qotei aqa medabu o tamo naŋgi nami soqneb deqaji bei kio? A olo subq na tigelqo.” 9 Ariya Herot a segi marej, “Jon agi e na kakoro gentem moiej koboej. Di tamo yaiyo olo bqo? E a qa anjam gargekoba queqnum.” Herot a degsi marsiqa Yesus unqajqa are qalsiq soqnej.

Yesus na tamo 5,000 naŋgi iŋgi anainjrej

10 Onaqa Yesus aqa aŋgro 12-pela qariŋnjrnaq qure qureq giloqneb qaji naŋgi olo Yesus aqaq bosibqa kumbra kalil naŋgi yoqneb qaji deqa Yesus saiyosib minjoqneb. Minjnabqa Yesus a qusiqa naŋgi joqsiq qure bei ñam Betsaida gileb. 11 Naŋgi gileqnabqa tamo uŋgasari naŋgi endegsib queb, “Yesus a Betsaida gileqnu.” Degsib qusibqa Yesus dauryosib gileb. Dauryosib gileqnabqa unjrsiqa minjrej, “Niŋgi are bulyibqa Qotei a nuŋgo Mandor Koba sosim niŋgi taqatŋgwas.” Tamo uŋgasari ma ti so qaji naŋgi dego Yesus dauryosib gileqnabqa a na naŋgi kalil boletnjroqnej. 12 Onaqa seŋ aisiq bilaqteqnaqa Yesus aqa aŋgro 12-pela naŋgi aqa areq bosib minjeb, “O Tamo Koba, ni na tamo uŋgasari naŋgi minjrimqa mati qure qureq gilsib di iŋgi uysib ŋereŋqab. Endi wadau sawa. Iŋgi saiqoji.” 13 Onaqa Yesus na minjrej, “Niŋgi na iŋgi anainjriye.” Degsi minjrnaqa naŋgi na kamba minjeb, “Iga iŋgi sai. Iga bem 5-pela qe aiyela segi unu. Di keresai. Iga qureq aisim iŋgi tulaŋ koba awaiysim tamo uŋgasari naŋgi anainjrqom di dego kereqasai.” 14 Naŋgi degsi mareb. Di kiyaqa? Tamo 5,000 soqneb deqa.

Onaqa Yesus a kamba aqa aŋgro naŋgi endegsi minjrej, “Niŋgi na tamo uŋgasari naŋgi minjribqa naŋgi qur segi segi 50 awoeleŋqab.” 15 Onaqa Yesus aqa aŋgro naŋgi na tamo uŋgasari naŋgi minjrnab dedegsib awoeleŋeb. 16 Awoonabqa Yesus na bem 5-pela ti qe aiyel ti di osiqa laŋ goge tarosiqa Qotei pailyej. Pailyo koboonaqa bem ti qe ti giŋgeŋyosiqa aqa aŋgro naŋgi enjreqnaqa naŋgi na osi giloqnsib tamo uŋgasari naŋgi jeisib enjreqnab uyoqneb. 17 Uynab kalil menetnjrej. Onaqa iŋgi oto urateleŋeb qaji di Yesus aqa aŋgro naŋgi na koroiyosib gumba kokba 12-pelaq di jignab maqeleŋej.

Pita a babtej, Yesus a tamo yai

18 Bati bei Yesus aqa aŋgro naŋgi ti sasalosib naŋgi segi sosibqa Yesus a Qotei pailyoqnej. Pailyo koboonaqa a na aqa aŋgro naŋgi endegsi nenemnjrej, “Tamo uŋgasari naŋgi e nuboqnsib naŋgi e yai qa mareqnub?” 19 Onaqa aqa aŋgro naŋgi na minjeb, “Tamo qudei naŋgi mareqnub, ni Jon yansnjro qaji tamo. Tamo qudei naŋgi mareqnub, ni Elaija. Ariya qudei mareqnub, ni Qotei aqa medabu o tamo nami soqneb naŋgi deqaji bei agi olo subq na tigelqo.” 20 Onaqa Yesus a naŋgi olo nenemnjrej, “Niŋgi segi e nuboqnsib niŋgi e qa kiersib mareqnub?” Onaqa Pita na minjej, “Ni Kristus, Qotei aqa segi Ŋiri qujai.”

Yesus a marej, “E moisiy olo subq na tigelqai.”

21 Pita a anjam degsi marnaqa Yesus a na aqa aŋgro naŋgi siŋgila na getentnjrsiqa minjrej, “Niŋgi anjam di ubtsib tamo qudei minjraib.” 22 Osiqa minjrej, “E Tamo Aŋgro. Deqa bunuqna e jaqatiŋ koba oqai. Agi Juda tamo kokba ti atra tamo kokba ti dal anjam qalie tamo naŋgi ti e qoreibosib lubsib moiotbqab. Bati qalub koboamqa e olo subq na tigelqai.”

23 Osiqa aqa aŋgro kalil naŋgi endegsi minjrej, “Tamo bei na e daurbqa osimqa a aqa segi areqalo kalil uratekritosim bati gaigai aqa segi ŋamburbas qoboiyosim e daurboqnem. 24 Tamo bei a aqa segi ŋambile qa areqalo kobaiyqas di a padalqas. Ariya tamo bei a e qa are qalsimqa aqa segi ŋambile uratqas di a olo ŋambile bole oqas. 25 Tamo bei a mandam qa ñoro kalil koroiyqas di mondoŋ aqa segi qunuŋ padalqas. Yimqa ñoro dena a kiersim aqaryaiyqas? Di keresai. 26 Tamo bei a ijo ñam qa ti ijo anjam marqajqa ti jemaiyqas di mondoŋ e Tamo Aŋgro ijo segi riaŋ na ijo Abu aqa riaŋ na ti ijo Abu aqa laŋ aŋgro naŋgo riaŋ na ti bosiyqa e kamba tamo di aqa ñam metqajqa jemaibqas. 27 Niŋgi quiye. E bole merŋgwai. Tamo qudei ijo areq endia tigelejunub qaji naŋgi moreŋosaisoqnibqa Qotei a bosim naŋgi taqatnjresoqnim naŋgi unqab.”

Yesus na aqa aŋgro qalub naŋgi joqsiqa koba na manaq oqsib dia Yesus aqa jejamu bulyonaq naŋgi unobeiteb

28 Yesus a anjam degsi marsiq koboonaqa bati 8-pela onaqa a Qotei pailyqajqa marsiqa Pita na Jon na Jems na naŋgi qalub joqsiqa koba na manaq oqeb. 29 Manaq oqsib dia Yesus a Qotei pailyeqnaqa aqa ulatamu bulyonaq naŋgi unobeiteb. Aqa gara dego tulaŋ puloŋosiq qatekritej. 30 Onaqa tamo aiyel brantosib Yesus ombla anjam maroqneb. Tamo aiyel di Moses wo Elaija wo. 31 Naŋgi aiyel riaŋ koba ti Qotei aqa siŋgila ti beb. Bosibqa Yesus a bunuqna Jerusalem dia aqa wau kobotosim moisim mandam uratqas anjam deqa Yesus ombla qairoqneb. 32 Yesus aqa aŋgro qalub naŋgi tulaŋ urŋamnjrnaqa ŋereŋesoqneb deqa olo qutuosibqa ŋam poinjrnaqa Yesus aqa riaŋ koba de ti tamo aiyel Yesus ombla tigelesoqneb qaji naŋgi ti unjreb. 33 Onaqa Moses wo Elaija wo naŋgi Yesus uratosib gilqa laqnabqa Pita na Yesus minjej, “O Tamo Koba, Moses wo Elaija wo bosib iga koba na endi unum di bolequja. Deqa iga tal kiñilala qalub gereiyqom. Bei ino. Bei Moses aqa. Bei Elaija aqa.” Pita a anjam bei marqa saiiyonaqa laŋa marej.

34 Mareqnaqa laŋbi aisiqa naŋgi kabutnjrnaqa naŋgi ulaugeteb. 35 Onaqa laŋbi miligiq dena anjam bei endegsi brantonaq naŋgi queb, “Endi ijo Aŋgro qujai e segi na giltem qaji. Niŋgi aqa anjam quetoqniye.” 36 Onaqa Yesus aqa aŋgro naŋgi anjam di qusib ŋam ateb naŋgi tamo aiyel di olo unjrosai. Yesus a segi naŋgi koba na sonab uneb. Bati deqa naŋgi kumbra uneb qaji di tamo qudei naŋgi minjrosaioqneb. Naŋgi mequmosib soqneb.

Yesus na aŋgro mel bei aqa jejamuq dena mondor uge wiyetej

37 Nebeonaqa naŋgi manaq dena olo aisib tamo uŋgasari tulaŋ gargekoba mana utruq dia tariŋeqnab itnjreb. 38 Onaqa tamo uŋgasari naŋgo ambleq dena tamo bei brantosiqa tulaŋ koba maosiq Yesus minjej, “O Tamo Koba, ni ijo aŋgro mel unime. A ijo aŋgro qujai bole qujai. 39 Mondor uge na aqa jejamu ojoqnsiqa mandamq waiyeqnaqa a tulaŋ koba leleŋoqnsiqa aqa medabuq na maul aieqnu. Mondor uge dena a qunjimyoqnsiqa aqa jejamu tulaŋ ugeugeiyeqnu. A yala uratosaieqnu. 40 Deqa e na ino aŋgro naŋgi minjronum, ‘Niŋgi mondor uge di wiyiye.’ Minjronumqa naŋgi na wiyqa yonub keresaiinjrqo.”

41 Onaqa Yesus a anjam di qusiqa marej, “Niŋgi tamo uŋgasari bini bati endeqa unub qaji nuŋgo areqalo e qa siŋgilatosai bolesai. Nuŋgo kumbra ti nuŋgo areqalo ti tulaŋ uge. Bati gembub e niŋgi koba na sosiyqa nuŋgo gulube di qoboiyoqnqai?” Degsi marsiqa aŋgro di aqa abu minjej, “Ino aŋgro mel di osau.” 42 Onaqa osi beqnaqa mondor uge dena aqa jejamu ojsiq mandamq waiysiq qunjimyoqnej. Yeqnaqa Yesus na mondor uge di ŋiriŋtosiq wiyonaq aŋgro aqa jejamu uratonaq boleej. Onaqa Yesus na aŋgro di baŋ ojsiq osi gilsiqa aqa abu yej. 43 Onaqa tamo uŋgasari kalil mana utruq dia soqneb qaji naŋgi Qotei aqa siŋgila di unsibqa naŋgi tulaŋ prugeleŋeb.

Yesus a olo marej, “E moisiy olo subq na tigelqai.”

Yesus a maŋwa di yej deqa tamo uŋgasari kalil naŋgi unsib prugeleŋosib are koba qaloqneb. Onaqa bati deqa Yesus na aqa aŋgro naŋgi endegsi minjrej, 44 “Niŋgi ijo anjam endi geregere quiye. E Tamo Aŋgro. Deqa sokiñalayitqa Juda tamo kokba naŋgi na e ojsib jeu tamo naŋgo baŋq di atqab.” 45 Onaqa Yesus aqa aŋgro naŋgi aqa anjam di qusib anjam aqa utru Qotei na ulitej deqa naŋgi poinjrosai. Osib naŋgi Yesus nenemyqajqa ulaeb.

Yesus aqa aŋgro naŋgi ŋiriŋosib aŋgro yai a segi qujai tamo ñam ti tigelqas deqa anjam na qotoqneb

46 Bati bei Yesus aqa aŋgro naŋgi segi segi ŋiriŋosib aŋgro yai a segi qujai tamo ñam ti tigelqas deqa anjam na qotoqneb. 47 Onaqa Yesus a naŋgo areqalo di qalieosiqa aŋgro kiñala bei osiqa aqa segi areq di tigeltosiqa aqa aŋgro naŋgi osornjrej. Osornjrsiqa minjrej, “Tamo bei a ijo ñam qa are qalsimqa aŋgro kiñala endego bei osim geregereiyqas di a e dego osim geregereibqas. Tamo a e osim geregereibqas di a na ijo Abu e qariŋbej qaji di dego osim geregereiyqas. Di kiyaqa? Nuŋgo ambleq di tamo bei na aqa segi ñam soqtqa uratqas di a na ijo aŋgro kalil naŋgi buŋnjrsimqa a segi qujai tamo ñam ti tigelqas.”

Tamo naŋgi niŋgi jeutŋgosaieqnub qaji naŋgi niŋgi koba na wau qujai

49 Onaqa Jon na Yesus minjej, “O Tamo Koba, ni que. Iga tamo bei unem. A ino ñam na mondor uge naŋgi winjreqnaqa iga na unsimqa saidyem. Di kiyaqa? A iga koba na wauosaieqnu deqa.” 50 Onaqa Yesus na minjej, “Niŋgi a saidyaib. Tamo naŋgi niŋgi jeutŋgosaieqnub qaji naŋgi niŋgi koba na wau qujai.”

Yesus a Samaria qureq bosim di ŋeiqajqa marnaqa Samaria tamo naŋgi na saidyeb

51 Onaqa Yesus a mandam uratosim laŋ qureq oqwajqa bati jojomonaqa a Jerusalem qureq aiqajqa areqalo qujaitosiqa Jerusalem areiysiq walwelej. 52 Walweloqnsiqa tamo qudei naŋgi qariŋnjrnaqa naŋgi namo aisib Samaria naŋgo qure beiq di brantosib Yesus aisim di ŋeiqajqa minjrnabqa naŋgi na saidosib minjreb, “Yesus a gago qureq baiq.” Naŋgi degsi saideb. Di kiyaqa? Naŋgi qalieeb, Yesus a walwelosiq Jerusalem aioqnej deqa. 54 Naŋgi degsib marnabqa Yesus aqa aŋgro aiyel Jems wo Jon wo naŋgi qusibqa naŋgi minjiŋ oqetnjrnaqa Yesus minjeb, “O Tamo Koba, ni marimqa iga ŋamyuo metonamqa laŋ goge dena aisim tamo naŋgi di koitnjrqas.” 55 Onaqa Yesus a bulosiqa naŋgi aiyel ŋiriŋtnjrej. 56 Osiqa aqa aŋgro kalil naŋgi joqsiqa koba na qure beiq aieb.

Tamo qudei naŋgi Yesus dauryqajqa mareb

57 Naŋgi gam dauryosib aieqnabqa tamo bei na Yesus minjej, “Ni sawa sawaq giloqnimqa e ni daurmoqnqai.” 58 Onaqa Yesus na minjej, “Bauŋ juwaŋ naŋgi tal ti. Agi sub miligiq di ŋereŋeqnub. Qebari naŋgi simi ti. Deqa naŋgi simiq di ŋereŋeqnub. Ariya e Tamo Aŋgro ŋeiqajqa tal saiqoji. Deqa ni e daurbqajqa gulube koba.” 59 Osiqa tamo bei minjej, “Ni e daurbe.” Degsi minjnaqa tamo dena minjej, “Od. Ni marsim odbimqa e mati aisiy ijo abu qa tariŋoqnqai. A moiimqa subq atsiy di e ni daurmoqnqai.” 60 Onaqa Yesus na minjej, “Uŋgum. Tamo moio qaji naŋgi segi na tamo moio qaji naŋgi subq ateleŋoqnqab. Ariya ni sawa sawaq giloqnsimqa Qotei a tamo uŋgasari naŋgo Mandor Koba sosiq naŋgi taqatnjreqnu anjam di minjroqnsim laqne.”

61 Onaqa tamo bei na Yesus minjej, “O Tamo Koba, ni marimqa e mati gilsiya ijo was naŋgi baŋ ojeleŋosiy bosiy ni daurmqai.” 62 Onaqa Yesus na minjej, “Tamo bei a kuñi ojsimqa a bulosim qoreq ŋam atoqnqas tamo dena Qotei a tamo uŋgasari naŋgo Mandor Koba sosiq naŋgi taqatnjreqnu anjam di mare mare laqa keresai.”